Real Texts
Where a word actually gets used.
Every document below is a real text — folklore, news, radio, records. Open one to read it, or search across all of them for a word.
Аш-Шакуру
Wikipedia ·
17 lines
· added 21 Jul
-
1
Жинца дагьа-макъал тӀагӀатазухъ гӀемерал даражаби кьолев, дунялалда рикӀкӀарал къояз гьабураб дагьа-макъаб гӀамалалъухъ ахираталда гӀорхъи гьечӀел нигӀматал кьолев.
-
2
Цо лъикӀлъиялда данде гьелдасаги цӀикӀкӀаралдалъун жазаъ гьабурав чиясда абула гьес гьеб лъикӀлъиялъе щукру гьабунин абун.
-
3
Гьединго жинца лъикӀлъи гьабурав чиясе жиндие гьабурас рецц-бакъ гьабуни, гьесдеги абула щукру гьабунин абунин.
-
4
ЛъикӀлъиялде данде гьелдасаги цӀикӀаралдалъун жаза гьаби халгьабуни, мутӀлакъав «шакур» Аллагь гурони ватуларо.
-
5
Щайин абуни, Гьес гьабулеб жазаялъе, ай жиндие ахир гьечӀел алжаналъул нигӀматазе гӀорхъи-рикӀкӀен гьечӀелъул.
-
6
ЛъикӀлъиялъухъ рецц-бакъ гьаби, баркала кьей хал гьабуни, нилъеда лъала, гьеб рецц букӀуна цоги чияс гьабураб пишаялъухъ.
-
7
Амма ТӀадегӀанав Аллагьас Жиндирго лагъзадерил пишабазухъ рецц-бакъ гьабураб мехалъ, гьеб ккола Жиндирго пишаялъе гьабураб рецц, гьезул пишабиги Гьес рижарал ругелъул.
-
8
Цонигияс жиндие щиб букӀаниги жоги кьун, гьелъухъ рецц-бакъ, баркала загьир гьабурав чи шакурлъун вукӀунев ватани, жинцаго кьезеги кьун, жинцаго рецц-бакъ гьабулев чи дагьавги рекъарав вуго шакурлъун вукӀине.
-
9
Къуръаналда гӀемерал аятал руго, ТӀадегӀанав Аллагьас Жиндирго лъикӀал лагъзадерие, аварагзабазе рецц-бакъ гьабулел, гьезул лъикӀаб гӀамал Жинцаго кьураб букӀингун цадахъ.
-
10
Лагъги вукӀине рес буго щукру гьабулевлъун цогидав лагъасе, цо мехалъ гьабураб лъикӀлъиялъухъ рецц-бакъ гьесие гьабиялдалъунги, цоги мехалъ гьес гьабуралдасаги цӀикӀкӀун данде гьесие лъикӀлъи гьабиялдалъунги.
-
11
Гьеб ккола лъикӀал, реццарал пишабаздасан цо пиша.
-
12
Свалат-салам лъеяв Аварагас абулеб буго: «ГӀадамазе щукру гьабичӀев чияс Аллагьасеги щукру гьабуларо», - абун.
-
13
Лагъас Аллагьасе гьабулеб щукруйин абуни, гьеб мажазалда гурони, хӀакъикъаталда букӀунаро.
-
14
Щайин абуни, гьес Аллагьасе кигӀан рецц гьабуниги, гьеб гьабун бахъунаро, мукъсанаб букӀуна.
-
15
Жив гьесие мутӀиглъиялдалъун щукру гьабулеб бугони, мутӀигӀлъиги Аллагьас гьесие кьураб цойги нигӀмат ккола.
-
16
НигӀматалъухъ жибго щукруги - Аллагьас гьесие тӀаде кьураб цойги нигӀмат ккола.
-
17
Лагъасе ТӀадегӀанав Аллагьас кьурал нигӀматазухъ щукру гьабиялъул бищунго лъикӀаб нух ккола, гьел нигӀматал Аллагьасе гӀасилъиялъе хӀалтӀизаричӀого, тӀагӀаталъе хӀалтӀизе гьари.